حكاية شي بن شي شى بن شى لاقى الصيادة قال لهم ...ا ن شاء الله ما تحصلوا شئ ...عطوه طريحة ,قال لهم أمالا يا سيادى شنو نقول ,قالوا له ستة وسبعة في النهار شوي ...مشي منهمفات على وحدين ناقلين ميت قال لهم...ا ن شاء الله ستة وسبعة في النهار شوي...عطوه طريحة,قالهم شنو نقول ,قالوا له عظم الله أجر الميت اللي عندكم ...........لاقى وحدين دايرين عرس وناقلين عروس في كرمود قالهم...الله يعظم أجر الميت اللي عندكم...عطوه طريحة,قال لهم أمالا يا سيادى شنو نقول ,قالواله قول مبروكة سعيد على أماليها....فات على وحدين عندهم كلبة واكلة جوف ولدهم قال لهم...قول مبروكة سعيد على أماليها...عطوه طريحة,قالهم يا سيادى قولو لي شنوا نقول,قالوا له قول تنبح وتلالي في الديار الخوالي ...القي واحد شاري بقرة وفرحان بيها وخاش بيها على عويلته ويصبوا لها في الحليب على وجهها...قاله ان شاء الله تنبح وتلالي في الديار الخوالي...عطاه طريحة ,قاله يا سيدي أمال شنو نقول,قاله قول زبادة لبادة على شواربه وشوارب أولاده ...خطم على وحدين يطلعوا في بيت راحة.قال لهم زبادة لبادة على شواربه وشوارب أولاده...عطوه طريحة,قال لهم أمالا يا سيادى شنو نقول ,قالوا له قول يبيس ويشيح وتقلة الريح...ألقى وحدين فرحانين يغرسوا في جنان كيف بادين فيه ...قال لهم أن شاء الله يبيس ويشيح وتقلة الريح...عطوه طريحة,قال لهم أمالا يا سيادى شنو نقول ,قالوا له قول قول يكبر ويقصل ويبدي كيف العنصل...خطم على ولد السلطان ضارباته شوكه...قاله يكبر ويقصل ويبدي كيف العنصل..عطوه طريحة وجوه بيقتلوه,جي للحراث اللي يحرث...قاله راهم جوك ياحراث....الحراث هرب وهو شد الجمل وقعد يحرث ,وهما مشوا في جرة الحراث قتلوه,وهو سلم الجمل لولد القاضي وقاله بره لبوك قول له حراثنا قتلوه خدم ولد السلطان... جي القاضي ...قالتله مرته,أنت كيف حراثك يقتلوه وتقول أنا والسلطان سوا سوا...والله لا كان ماقتلتش اللي قتل حراثك ما عاد قاعدتلك...دار سيدنا القاضي لبس عمامته وركب حمارته وجي طوالي لخدم السلطان ..قال وين اللي قتل حراثنا...قالو له ها هو ناض قتله..السلطان قالتله السلطانه انت سلطان واش بعد القاضي حاكم فيك...مشى السلطان قتل القاضي وركبت في بعضها وجيت منهم وخليتهم وبوذني سمعتهم وبعيني ماريتهم .....بهذا تكون القصة قد أنتهت وكلي أمل أن تنال اعجابكم وأن لا تكون مملة وشرفوني بأرائكم وردودكم</FONT></B>
السبت يوليو 11, 2009 4:15 pm
