محتاج لرأيكم ضروري جدا....موقف صار معاي !!!!!

السلام عليكم ورحمة الله

كيف حالكم
ان شاء الله تمام

مانبيش انطول عليكم هلبا لكن الموقف هدا صار معاي وخلوني انقوللكم القصه :

انا اتعرفت على وحده من شهر 12اللي فات وكنا نتكلم دايما وفيه فتره اتكلمنا بيها بي معدل يوم بعد يوم في الموبايل بين مصر و ليبيا
يعني من شهر 12 الى اخر شهر تقريبا 3 وبعدها اختفت وما عندي عليه اي اخبار وموبايلاتها مسكره هدا كله صار فجأة ومن غير اي سبب او مقدمات
المهم بعد فترة القيتها اتخش للايميل وانخش نسأل عليها وترد عادي جدا كأن مافي شي صاير وقالت ان الموبايل انسرق وما تتكلمش هلبا يعني شويا واتقولي خليك شويا ونرجع ومعش ترجع دارتها معاي اكتر من مرة الحركه هادي المهم بعدها بي فتره كنت انشوف فيها اتخش على الايميل وهيا اتشوف فيا موجود ولا تسأل عليا ولا تكلمني وتطلع عادي من غير حتى سلام وانخليلها في رسائل وما اترد عليا !!!!!

بالله لو انتم في مكاني والشخص هدا ايهمك هلبا وعزيز عندكم وليه مكانه خاصه بالقلب شن بتفكرووا
(( اكيد بتشكوا ان فيه شي صاير ,,,, او اني غالط فيها اود درت شي غلط )) صح


المهم من يوم اتعرفت عليها كانت المبدأ اللي اتفقنا عليه الصراحه واني عمري ما كدبت عليه في اي شي طول مدة تعارفي عليها
و يوم اتعرفت عليها قالت انا حبيت شخص وسيبته في شهر 9 ومعش انكلم فيه لانه حب وحده تانيه وبعدها عمرها ما قلت عليه شي تاني طول مدة تعارفنا ,,, و الصدق اني تعلقت بيها وقابلتها في ليبيا وما كانت فيه اي مشاكل ولا اي شي
وانا اتعرفت عليها عن طريق موقع تعارف
قلت لي نفسي هيا مرات ما تبيش تتكلم لي مواطن ليبي
لكن ممكن مع الوقت تحكي لي حد تاني
المهم اني درت شخصيه تانيه في الموقع هدا وبعتلها اضافه
وعلى طول قبلت الاضافه عادي وبعتلها الايميل وردت عليا بالايميل متعها في رساله عادي يعني هادي حريه شخصيه
المهم بعد حوالي 3 ايام لقيتها واتعرفت من جديد وكانت اول 3 كذبات (( الاسم ,, السكن ,, العمر )) هدا الشي الوحيد اللي كذبت فيه
وهيا عادي كانت تتكلم واتعرفت ودخلت فيها عادي المهم قالتلي حاجات المفروض ما تنقال لي اي حد بكل يعني المفروض اشخاص معينين اللي يعرفوها مش شخص من اول يوم وخلوني انقول بي ملخص الكلام اللي قالته ::
اول شي انها اتحب شخص من 3 سنوات وديما يتعاركو
وامتى اخر مره كلماته: كان اليوم وسكر عليها الموبايل
وامتى ارجعتوا لي بعض من من اخر مشكله : من شهر واسبوع تقريبا
وامتى تعاركتوا مع بعض اخر مرة قالت ديما نتعاركوا ونرجعوا لي بعض
سألتها عندك اصدقاء شباب : قالت كان عندي هلبه زي خوتي واعز .,,بس حضرت جنابو ما يبيش فاجبدت عليهم
سألتها وكيف تقطعي علاقاتك هكي باصدقائك ::قالت ماهو من ظنانه عليا ...ومن كثر المشاكل
سألتها انتي اتكلمي في اصدقائك بالموبايل والا بالايميل؟ :: قالت بالايميل ومرات بالموبايل
قلتلها المهم انتي مواصلتيهم ::قالت ايه
وبعدين قالت :: وفي صديق قتله اني مانقدرش نستغنى عليه وقاعده انكلم فيه : (( فرحت نحساب روحي اني )) ههههههههههههههه ضحكه من القهر
قتلها مني الشخص هدا ممكن نعرفه :: قالت احد كان زميلي ويعرفه حتى هوا قالت قصدي اني ما انكلمش فيه ديما بس لما نبدااني مضايقه بس
المهم جينا في مرحلة الموبايل وسألتها كدا سؤال وكان السبب منه اني نعرف قصة تسكير الموبايل فكان :
قتلها كيف اتكلمي في اصدقائك : قالت لو نبي حاجه انكلم الشخص اللي نبيه وما عندي كثر كلام
قتلها قصدك معش اتردي على اصدقائك :: قالت لالا بس مغيره الرقم !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
قتلها وغيرتيه على خاطره هوا : قالت لالا كان الاول كان هكي السبب شريته على خاطره وبعدين ما فتحتها وخليتها وتوا عطيته شفرتي الاولى واني افتحت هادي


صدمه لي مواطن

المهم
قتلها انتي تعرفي شن اديري توا : قلت شني
قتلها اني نعرف كيف ايرضوا في الشباب : قالت يلا قول كيف
قتلها الموبايل في جنبك توا :: قالت لا لا لكن في التليفون الارضي جنبي
قتلها لا الموبايل خير : قالت لا بعيد بس علاش
قتلها تبعتيلا رساله وانقولك شن تكتبي فيها بس : قالت صعب في الدار وكان نضت انجيبه مرات اينوضوا العيله


المهم بعد هدا كله قتلها

شوفي اول مرة نتعرفوا وين مشينا صح : قالت ايه
قلت ما احلها الصراحه : قالت تعرف استريحتلك هلبه هلبه

*******************************
هدا ملخص الكلام والحوار اللي صار ما بين الشخصيه التانيه وما بينها
وبعدها دخلت انا من ايميلي على اللاب توب وبعتلها سجل المكالمه كامل مع العلم اني كنت انكلم فيها مرتين في نفس الوقت المره الاولى في شخصية مواطن ومن الشخصيه التانيه في نفس الوقت
*******************************
في الاول قالت انها عارفه بس صدقوني ان اللي عارف ما ايعصب هكي وياخدها بي ضحكه
وبعدين قلت انا ليش ما قلتيليش على الحاجات هادي من الاول
قالت هادي اسرار وما نبيش انقول عليها لي حد وهادي خصوصياتي (( مع العلم انها قالتها لي شخص اول مرة تتكلم معاه ))
انا قتلها مش لازم اتقوليلي كل شي بس توزيع كدب لا
قوليلي يا مواطن معش اتكلمني لاني مرتبطه اهون من انك تكدبي عليا
قوليلي اي شي بس توزيع وكدب لا
قالت يا مواطن هادي خصوصياتي مانبي حد يعرفها وقاعده اتعاود في الكلمه هادي
المهم قالت انت كنت صديق وليك مكانه خاصه عندي بس انتي ريحتها بي عملتك هادي
هدا دليل على انها ماكانتش تعرف اني انا اللي كنت انكلم فيها بالشخصيه التانيه !!!!!!!!!

قتلها يعني انتي ما تعرفيش معنى الصداقه لو هدا اسلوبك او تفكيرك
قالت واللهي
قالت شوف تعرف حتى ولو الشخص اللي انحبه او روحي فيه او صديق يستغفلني نمسحها من حياتي وننساه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
انقلب الموضوع من زعل مني اني الى زعل منها هيا وقلبت الموضوع كله باش نطلع اني اللي غالط وهيا لا

قتلها الغايه تبرر الوسيله
اني حبيت نعرف اي شي ليش اسلوبك هكي متغير معاي
قالت مش بالاسلوب هدا
قلت قولي اي اسلوب اني ما درتاش واني نطلع الغالط
اترجيتها اطلعني الغالط ... بس هيا ما ردتش وقالت ماعندي ما انرد عليك


*************************************************
ارجوا من كل من يقرا الموضوع ايقولي اني في شني غلطت
وهيا في شن غلطت


مع العلم ان المبدأ من يوم تعارفنا كان على الصراحه و قتلها اكره شي عندي الكدب وهيا نفس الشي
وو مع العلم انها قريبتي


واني ما زلت متمسك بيها كصديق لاني ارتبطت


والغاية تبرر الوسيله

احترامي

اللهم امين
شكرا ليك اختي إسلام
وشكرا على نصيحتك
لكن اني ما قلت اني نبيها
بس الله يغفر ويسامح وما اتجي علينا احني البشر وما انسامحوا ولا نغفرو صح
بس هدا في حال هيا اعترفت بالخطأ
**********
وبالنسبه للتهرب مني اني حاولت نعرفه هل هوا بي قصد او لا
لان .. قالى تعالى (( ياأيها الذين آمنوا أجتنبوا كثيرا من الظن ان بعض الظن أثم ..)) صدق الله العظيم
اني ما نبيش اندير شي لين نتأكد
لان ممكن فيه شي صار مني واني مش عارف الشي هدا او ممكن زي ما اتبرر هيا ديما ان النت ضعيف ومعش ايخش والا ماتفضاش زي ما اتقول يعني هدا في حالة بررت الموقف
واني حتى ولو مرتبط عمري ما ننسى اصدقائي وخوتي اللي في النت
ممكن ايكون في ورطه ممكن ايكون فيه شي ومع هدا هيا قريبتي
لان اللي صاير غير طبيعي فاهمه قصدي يعني من غير اي شي صار

اني ما انحب نخسر حد مهما كان
اني انسامح مرة واتنين عادي
اهم شي الشخص يعترف بي غلطه وايحاول ايعدل من نفسه و يصلحها
***************
اسلام حطي روحك في مكانها مره وفي مكاني مرة
ويا ريت تعطيني رأيك بصراحه

حشاك من الاتنين انتي او اتحطي روحك في مكان غير مكانك بس نبيك اتفكري مرة بتفكيرها ومرة بي تفكيري بس
واتقوليلي شن رايك
واي سؤال اني حاضر




وبارك الله فيك يا إسلام

اولاً : شكراً على الكلام الجميل وزي مايقولو المسامح كريم
ثانيا: أنت قلت أنها قريبتك يعني من عائلتك ، تقدر تتأكد من حسن نواياها بمقابلتها شخصياً باش تعرف سبب ابتعدها وممكن زي ماقلت فيه سر لجفاها عنك اقصد هناك مشكلة غامضة بينكم.
والصداقة الحقيقة يجب أن تكون مبنيه على التفاهم والصدق والصراحة حتى لو شافت منك أشياء غامضة يجب أن تصارحك ولا داعي للف والدوران.
صداقتكم يجب أن تكون مبنيه على التفاهم والشفافية في الحديث وتجنب الغموض والخداع والكذب والشك لأنه يؤدي بكم الى مايحمد عقباه وهو الفراق .
أخي مواطن ماعليك فعله هو أن تتأكد من قريبتك لماذا تعاملك هكذا حتى لو اضطرت لمقابلتها مرة أخرى شخصياً وحسب ماقرأت في القصة أنك لا تحب أن تفارق اصدقائك .

وربي يجيب إلا فيه الخير

شكراً مرة أخرى

احترامي

شكرا ليك اختي اسلام
وبارك الله فيك
اولا هي قريبتي صح بس شفتها مرتين في حياتي
وعرفتها من 6 شهور تقريبا
يعني اتعرفنا بالصدفه في النت وطلعت قريبتي من نفس العائله
وتوا صعب اني انقابلها لاني طلعت من ليبيا اول شهر 3 وراجع نص 9 يعني قبل العيد بأذن الله والموضوع هدا عندي ما يتحملش الوقت هدا كله يعني ما يستناش 3 شهور تانيات .......
وبالنسبه للصداقه معش عرفتها كيف اني
كلامك منطقي اختي لكن العالم توا معش ايفسر فيها هكي
بدي كل واحد ياخد في قوانين لي روحه ويسرد فيها للصدقه
سبحان الله

مشكلتي اني ما انحبش نخسر حد
هل هادي طيبه او شني بالزبط
مش فاهم اني شي




ومرة تانيه بارك الله فيك اختي إسلام
وان شاء الله اللي فيه الخير ايجيبه ربي


احتراماتي

سلام عليكم
سامحنى فى تدخل خوى مواطن
انتا الحق يلى عليك درته هو انك تبى تعرف سبب تغير يلى صار
حسب مافهمت من الموضوع سبب تغير هو انك طلعت قريبه
والله يعلم مافى القلوب
صداقه بدت كلمه تخرج من شفاه وليس فعل
لكن الفرض منه انه توضح سبب تغيره عليك على الاقل تفهم راس من رجليك
واهم شى انك انت مغلطش فيها وعارف نفسك اوكى
امحه من سجلك لنه ممكن رح تكون ليك حجرة تتعتر بيه فى حياتك

وعليكم السلام اخي نمر
اولاً اخي نمر انا لما حطيت الموضع حطيته للجميع يعني نبي نعرف رأي الجميع
وشكرا ليك لي قراءة الموضوع واعطاء رأيك فيه
لالا مسألت اني طلعت قريبه هادي مسألة قديمه يعني من الاول بكل ....
وهدا اللي كنت نبي نعرفه من الاول اني نعرف راسي من رجليا ...
الحمد لله حتى يوم درت الشخصيه التانيه قتلها عليها في نفس اليوم
و واتق من نفسي اني ما غلطت فيها بكل
وبالنسبه اني نمسح حد من سجلي هادي صعبه شويا
واذا كان على الحجرة ما اتخاف مش من الساهل نتعتر بيها

بارك الله فيك اخي نمر

خوي مواطن أنت باين عليك ومن كلامك أنك طيب للغاية وماتيبش تخسر اصحابك
حتى لو غلطو فيك هذا الا فهمته من كلامك
وكلنا طيبين ومتسامحين لكن فيه ناس ماتستاهل حتى تطلق عليها السلام مع أنه تحية الاسلام مفروضة علينا نقولها ومع هذا مايستاهلو أنك تحييهم لأنه أنت طيب معاهم وهما يعاملو فيك معاملة ثانية مثل الاستكراد أو عدم المبالاة مثل قريبتك .
يامواطن أنت خلي عندك شخصية ومعاش ادورها وسامحنى خوي هيا لو تتحشم وتعرف معنى كلمة قريب مش ممكن ادير معاك هكي لو كنت براني كيف دارت معاك .
يامواطن أنت لو متبيش تخسرها معاش ادورها ولا تتصل بيها وهيا لو نيتها صافية تجاهك اكيد تتصل بيك وتتعذر عن مابدر منها .
خليك في دراستك ومهرجاناتك المشرفة الا رفعت رأس بلادنا ورأسنا للعالي والله أنت وزملائك الا معاك في الصور فخر لينا ولبلادنا وعزها.
ربي يحفظكم ويكثر من أمثالكم وزي ماقتلك أنت طيب هلبه وحساس وماتبي حد يزعل منك ولا تبي حد يأخذ منك موقف ، لكن الطيبة هلبه مش كويسه ، أملاء وقت فراغك في شيء يهمك ويفيدك في مستقبلك وكان يتقعد تندب على حظك مش راح تمشي للامام
لا سامح الله .
وديمه ادعي يامواطن وقول - ربي يبعد عنا ولاد وبنات الحرام
اللهم أمين

موفق خوي مواطن وربي ينجحك ويحفظك لأهلك
احترامي

السلام عليكم
ا لحقيقة خوي مواطن ليبي موضوعك كبير وحساس وكيف قدرت تناقش
ودور على اسباب تغيرها عليك
كان من المفروض تقطع اتصالك بها من اول متغيرت عليك وتهربت من الرد عليك
لان الموضوع واضح
بس انت بحسن النية اتعاملت معاها
انت مغلط بس بصراحة هي متستاهل صديق طيب زيك وربي يوفقك
ويسعدك

بارك الله فيك اختي اسلام ما قصرتي
وكلامك صح وعلى عيني وراسي
صح ممكن الطيبه هيا اللي مفسدتني مش عارف
وفعلا اصلا حتى اني معش اتصلت ولا عاد سألت بعده

ربي يبعد عنا ولاد وبنات الحرام
امــــــــــــين يا رب

***************************
الله غالب شن بندير يا زهرة هدا اللي صار
وبارك الله فيك على مروورك

تحياتي ليكم

الله يسلمك خوي مواطن لكن نبي نعرف شن القرار إلا أتخذه بهذا الخصوص
شن النتيجة إلا تحصلت عليها من خلال ردودنا ومن جهتي لو تبي أي نصيحة أنا على أتم الاستعداد لأني أحب أن أنصح الناس للخير
وربي يوفقك
احترامي

السلا عليكم ورحمه الله وبركاته

عليكم جميعا

ونهارك مبارك عليك يا مواطن

اولا ربنا يصبرك ويهدى سرك
وزى ماقالت اختى اسلام يبعد عنا ولاج وبنات الحرام


بالنسبه لموضوع البنت ااحنى كلنا سمعنا من وجهه نظرك انت فقط

والتى لا يخفى علينا شخصيتك وروحك وطيب اخلاقياتك

والحمدلله

بس بمنظور البنت الله اعلم شن صاير معاها

يمكن عندها شى

يعنى لو متاكد انك مغلطش فيها او وجعتها او حست بعدم الامان معاك فهروبها كان بدون مبرر

او اسباب الا انها

متبيش ترتبط بيك للاسبابها الخاصه ممكن زى ماعرفت من الشخصيه الوهميه ان عندها حبيب متعلقه بيه وفى خصام دائم فهيا مش حاسه معاه بالامان فترتبط بشباب غيره عن طريق النت او بالحضور الشخصى بس لاجل تملاء الفراغ اللى عندها فى نفسها فى حاله غياب حبيبها

وللاسف ممكن اه ممكن تكون انت واحد من الاشخاص اللى عبت بوجودك الفراغ هذا واول مارجعلها حبيبها خلاص قررت الهروب منك والابتعاد

بتغير الشفره

والبدء فى دوره حياه التلوين وتغير

والله يهديها ويهدينا اجمعيين
يعنى لا تلوم نفسك ولا تتساءل ليش ابتعدت وليش انا يصير معاى هكى وليش وليش

وياترى انى السبب

وخصوصا انك بانتحالك للشخصيه تاكدت من الشئ هذا
والحمدلله

ودائم الانسان لما يكون صادق وصريح وشفاف ميخافش من الغلط

سواء فى حق نفسه او حق الاخريين

لان هذه الدنيا فيها كل شى وكل يوم بتصادف وتتعامل مع البشر

فيهم الطيب وفيهم الشرير فيهم اللى معدنه صافى

وفى اللى غير بس يقدر يعيش على الخداع والاحتيال

ولازم نكونوا مهيئيين اننا نتعاملوا مع كل هذه الصفات

وزى ماقتلك طالما انت واضح وصريح وصادق خلاص متلومش نفسك وامضى فى حياتك قدما

والله يوفقك ويهنيك
ويتمم عليك بالف خير انت وشباب وصبايا المنتدى

ولا تتوقف كثيرا على هذا الموقف

الايام كفيله بكل شى

وتعرفك ان مش اى حد يستحق المشاعر

والصداقه انزه من انها تكون هكى


لان يا خوفى تقدملها صداقتك وتلقى فى المقابل مالا يرضيك

ووفقك الله ووفق الجميع

والله يطيحكم فى خيره واطهر الخلق

إسلام كتب:

الله يسلمك خوي مواطن لكن نبي نعرف شن القرار إلا أتخذه بهذا الخصوص
شن النتيجة إلا تحصلت عليها من خلال ردودنا ومن جهتي لو تبي أي نصيحة أنا على أتم الاستعداد لأني أحب أن أنصح الناس للخير
وربي يوفقك
احترامي

ويسلمك يا رب اختي إسلام
بالنسبه للقرار انا اخدت قرار واحد بس لكن حبيت نتأكد منكم وتدعموني فيه
لاني في فترة شكيت في قراري وحسيت روحي غلطت
واني قررت اني معش انكلمه بكل لين تعتدر عن اللي صار واتبرر لي احمد اللي صار كله
والنتيجه اللي تحصلت عليها من الردود اني تعلمت منكم هلبا
والله لا يحرمني منكم وما غلطت اني عرضت الموضوع عليكم

وبارك الله فيكم
وبارك الله فيك اختي اسلام

وعليكي السلام اختي يسرا
ان شاء الله اجمعين يا رب


ومن ناحية انكم سمعتوا من وجهة نظري اني بس صح
واني جبتلكم المحادته اللي صارت ما بينا وعلى هدا حبيتكم تحكموا
وبالنسبه لي حبيبها هيا اعترفت انها بيه .... و هادي حريتها بس ما تكدب واتقول من شهر 9 ما كلمتاش وهيا تتعارك معاه وترجع طول الوقت والمده اللي كلمتها فيها .... وهيا ممكن دارتني لي اوقات الفراغ بس مش عارف بس هدا الواضح زي ما قلتي

وباااااااااااااارك الله فيك اختي على كلامك الحلو

***************************








شكرا ليكم كلكم على شعوركم الجميل و النبيل اتجاهي
وربي ما يحرمنا منك يا رب

مواطن ليبي كتب:

إسلام كتب:

الله يسلمك خوي مواطن لكن نبي نعرف شن القرار إلا أتخذه بهذا الخصوص
شن النتيجة إلا تحصلت عليها من خلال ردودنا ومن جهتي لو تبي أي نصيحة أنا على أتم الاستعداد لأني أحب أن أنصح الناس للخير
وربي يوفقك
احترامي

ويسلمك يا رب اختي إسلام
بالنسبه للقرار انا اخدت قرار واحد بس لكن حبيت نتأكد منكم وتدعموني فيه
لاني في فترة شكيت في قراري وحسيت روحي غلطت
واني قررت اني معش انكلمه بكل لين تعتدر عن اللي صار واتبرر لي احمد اللي صار كله
والنتيجه اللي تحصلت عليها من الردود اني تعلمت منكم هلبا
والله لا يحرمني منكم وما غلطت اني عرضت الموضوع عليكم

وبارك الله فيكم
وبارك الله فيك اختي اسلام

زينك كلام وزي ماقتلك معاش تكلمها ولا تتصل بيها وياريت لو عندك صديق في الدراسة مقرب ليك تزيد تحكيله على القصة هذا لو معندكش مانع باش تشوف رأيه زي رأينا ولا العكس
وأنت مش غالط أنك عرضت علينا القصة باش تأخذ رأينا لأنه الموقف الا صار معاك لا يمكن يصدقه أي شخص في مكانك وخاصة أنه صاحبة المشكلة قريبتك .
ربي يوفقك ويبعد عنك المشاكل ولا مايخاف الله

احترامي

بارك الله فيك اسلام

شكرا ليك
وربي يسعدك في الدنيا وفي الاخرة يرزقك بالجنه يا رب

اللهم أمين أجمعين

بارك الله فيك وجزاك الله كل خير

لو مازال بتواصل بخصوص موضوعك أني موجودة وجميع الاعضاء معاك بإذن الله

بارك الله فيكم
و ربي ما يحرمني من امثالكم


ولو فيه جديد اكيد بنتواصل معاكم

فيك بارك الله
وأي خدمة نحن على استعداد

احترامي